Skyndihjálp
Meðvitundarleysi
- Einstaklingurinn er meðvitundarlaus.
- Hallaðu höfði einstaklingsins varlega aftur. Horfðu og hlustaðu eftir því hvort hann andar eðlilega.
- Ef hann andar eðlilega veltu einstaklingnum á aðra hliðina og hallaðu höfði hans aftur.
- Hringdu í Neyðarlínuna 112 eða fáðu einhvern nærstaddan til þess.
- Fylgstu með ástandi einstaklingsins þar til sérhæfð hjálp berst.
- Hvernig get ég hjálpað ungabarni sem er meðvitundarlaust, svarar ekki áreiti en andar eðlilega?
Haltu á ungabarninu í hliðarlegu í fanginu á þér og hallaðu höfði þess aftur. Hringdu í Neyðarlínuna 112 eða fáðu annan til þess að hringja.
- Af hverju þarf ég að halla höfði einstaklings aftur þegar ég athuga hvort hann andi eðlilega?
Hjá meðvitundarlausum einstaklingi slaknar á tungunni og hún getur lokað öndunarveginum. Með því að halla höfðinu aftur opnast öndunarvegurinn þar sem tungan færist fram á við. Með því að sveigja höfuðið má koma í veg fyrir að tungan loki öndunarveginum og tryggja að blóð eða uppsölur fari út um munninn.
- Ef mig grunar að einstaklingurinn sé með áverka á hrygg eða hálsi á ég samt að setja hann í hliðarlegu?
Það er forgangsatriði að einstaklingurinn andi áfram eðlilega. Ef þig grunar áverk á hálsi eða hrygg farðu varlega, reyndu að halda hryggnum beinum þegar þú snýrð einstaklingnum og fáðu einhvern til að aðstoða þig ef hægt er.
- Hvernig á ég að kanna hvort einstaklingurinn andi eðlilega?
Þegar þú hefur hallað höfði einstaklingsins aftur skaltu athuga hvort brjóstkassinn rís og hnígur. Gáðu hvort þú finnur andardrátt hans á vanga þínum.
- Á ég að reyna að tala við einstaklinginn?
Já, talaðu við hann og hughreystu. Þótt einstaklingurinn geti ekki svarað þér getur verið að hann heyri.
- Hvað á ég að gera ef einhver er við að falla í yfirlið?
Ef einstaklingur er við að falla í yfirlið skaltu ráðleggja honum að leggjast niður. Yfirlið orsakast af tímabundnu skertu blóðflæði til heila sem getur valdið skammvinnu meðvitundarleysi. Ef einstaklingurinn rankar ekki fljótt við sér skaltu veita honum skyndihjálp eins og um meðvitundarleysi sé að ræða.